Monday, May 17, 2021

അങ്ങനെ ഒന്നുമില്ല

ഒരൊഴുക്കൻ മട്ടിൽ

"അങ്ങനെ ഒന്നുമില്ല"
എന്ന കവിത 
പലപ്രാവശ്യം ചൊല്ലിപ്പോയിട്ടുണ്ടു 
ഞാനും , നിങ്ങളും.

അവളെ കണ്ടു  മടങ്ങുമ്പോൾ ,
സങ്കടപ്പെടണ്ട 
എന്ന വാക്കിനു 
മറുവാക്കായാവാം 
"അങ്ങനെ ഒന്നുമില്ല"
എന്ന കവിത
ആദ്യമായി ചൊല്ലിയതു.

പലരുമിതു പലവട്ടം തെളിഞ്ഞു 
ചൊല്ലിയിട്ടുണ്ട് 
കണ്ണിൽ പ്രണയക്കടൽ ഒളിപ്പിച്ച്
‌അവൻ പറയും -
"അങ്ങനെ ഒന്നുമില്ല"
ഉള്ളിൽ സങ്കടത്തീ നിറച്ചൊരമ്മ പറയും
"അങ്ങനെ ഒന്നുമില്ല"
കരളുതൊട്ട കൂട്ടുകാരനു വേദനിച്ചാൽ പറയും
"അങ്ങനെ ഒന്നുമില്ല"
കാത്തിരുന്നുകിട്ടിയ ഉമ്മ 
കിട്ടിയോ എന്നു ചോദിച്ചാൽ 
എല്ലാരും പറയും,
"അങ്ങനെ ഒന്നുമില്ല"

അങ്ങനെ ഒന്നുമില്ല ,
അങ്ങനെ ഒന്നുമില്ല,
അങ്ങനെ ഒന്നുമില്ല ( ഞാൻ ചൊല്ലി മടുത്തു.)

കൂട്ടുകാരാ
താങ്കളുടെ ചോദ്യം ഞാൻ കേട്ടിരിക്കുന്നു.
ഇതെന്തു കോപ്പിലെ കവിത എന്നല്ലേ.?
അതിനു ഉത്തരമാണു ആദ്യമേ പറഞ്ഞതു.
"അങ്ങനെ ഒന്നുമില്ല".

.....................
LitArt April 2021

കുഴിയാന

വെളുത്ത കൊമ്പും 
നെറ്റിയിലൊരു പട്ടവും 
തലയ്ക്കു മീതെ തിടമ്പും 
കാലിലൊരു ചങ്ങലയും 
കൊമ്പിൽ കോർക്കാനൊരു 
പാപ്പാനുമില്ലാഞ്ഞിട്ടും 
കുഴി 'ആന' 

താനേ കുഴിച്ച കുഴിയിൽ 
പതിയിരിക്കുമ്പോഴും 
പറക്കാനുള്ളൊരു സ്വപനം 
കുഴിയാന 
കാത്തുവയ്ക്കുമായിരുന്നു  .
മേളം പെരുകുമ്പോൾ 
ആശ്വാസത്തിനായി 
ഒരാന കാട് സ്വപനം 
കാണുന്നത് പോലെ. 

സന്തോഷങ്ങളുടെ 
ഇമയനക്കങ്ങൾക്കായി 
കുളിച്ചു പൂശാനും 
ഒളിച്ചിരിക്കാനും 
മണല് വേണം 
രണ്ടുപേർക്കും 
എന്നതൊഴിച്ചാൽ 
നിഗൂഢമായ ഒരു 
ഒളിവു ജീവിതത്തെ 
തുറസ്സായൊരു 
കാട് ജീവിതത്തോട് 
കൂട്ടികെട്ടാൻ 
ആരാവും 
വാരിക്കുഴി കുത്തിയതു ?

ഒന്നോർത്തു നോക്കിയാൽ 
ആനയെ വരക്കാൻ പോലും 
എന്തെളുപ്പമാണ് ?
റ യിൽ രണ്ടു വരയിൽ 
കൊമ്പു .
നാല് വരയിൽ 
കാല് .
പക്ഷെ 
കുഴിയാനയുടെ 
ഒരു 
ചിത്രം പോലും കണ്ടിട്ടുണ്ടോ 
നിങ്ങൾ ? 

..............................
തസ്രാക് മാഗസിൻ - March 2021

Saturday, January 2, 2021

പക്ഷി


വീടിന്റെ മരത്തിന്റെ 
ചില്ലയിൽ ഒരു കിളി 
വന്നിരുന്നു പാടുന്നു. 
ഇണയെ കൊഞ്ചി 
വിളിക്കുന്ന പോലെയോ 
സംസാരിച്ചു തുടങ്ങിയിട്ടില്ലാത്ത 
കുഞ്ഞിന്റെ പാട്ടുപോലെയോ 
ഭ്രമാത്മകതയുടെ 
ആവിഷ്കാരം പോലെയോ 
പ്രകൃതിയുടെ പൂര്ണതപോലെയോ 
അങ്ങനെ ഏതൊക്കെയോ 
തോന്നി എനിക്ക് .

ഞാനൊരു 
തോക്കെടുത്ത് ഉന്നം 
പിടിച്ചു.
 
എനിക്ക്  പെട്ടന്ന് 
മാധവിക്കുട്ടിയെ ഓർമ്മ വന്നു 
അവരുടെ വാക്കുകളും. 

മുറിക്കവിതകൾ 

 


ഉറുമ്പിനോളം ചെറുതാവുമോ 
ഉറുമ്പിൻ സങ്കടങ്ങളെന്നു 
ഓർത്തോർത്തു ഉറങ്ങാതിരുന്ന 
ഒരു കുട്ടി 
വലുതായപ്പോൾ 
പ്രപഞ്ചത്തോളം വലുതാവുമോ 
പ്രണയമെന്നു അന്തിച്ചിരിക്കുന്നു .

...................................................................

ഹലോ 
ഹലോ 
കഴിച്ചോ 
കഴിച്ചോ 
:-)
:-)
പിന്നെ ഉണ്ടല്ലോ 
പിന്നെ ഉണ്ടല്ലോ 
ടെലിപ്പത്തിയെ കൊണ്ട് തോറ്റു.
മറ്റാർക്കും മനസ്സിലാകാത്ത 
കവിത പോലെ 
എത്ര നേർത്ത നൂലുകൊണ്ടാവും 
പ്രണയം കണക്ട് ചെയ്യപ്പെടുന്നത് .

മുറിക്കവിതകൾ. 


ഒരിക്കലൊരു തെരുവിൽ വച്ച് 
എന്നോടൊരു  വൃദ്ധൻ സ്വപ്‍നം  
ദൈവത്തിന്റെ ഭാഷയാണെന്നു പറഞ്ഞു.
ഒരു സ്വപനങ്ങളുടെയും അർത്ഥമറിയാത്ത 
ഞാൻ കവിത എഴുതാൻ തുടങ്ങി.
............................................................................

പാതി പാടി നിർത്തിയ ഒരു പാട്ടിനെ 
വീണ്ടുമോർക്കുമ്പോൾ 
തോന്നുന്നതെന്താവും .
മുഴുവനാവാത്തതിന്റെ രസമോ ?  
കുഞ്ഞു കുഞ്ഞു താളപ്പിഴകളോ ? 
അങ്ങനെ ഓർക്കുമ്പോൾ തോന്നും 
പാതി പാടി നിർത്തിയ പാട്ടാണെന്റെ 
പ്രണയമെന്നു .

................................................................................ 
ഏറ്റവും പ്രയാസപ്പെട്ടു 
നേടിയതും എന്നാൽ 
സന്തോഷം തന്നതുമായ 
ഒരു രാജ്യത്തെ പറ്റി 
പറയാൻ 
ലോകം കീഴടക്കിയ 
ചക്രവർത്തിയോട് 
ഒരാൾ ആവശ്യപ്പെട്ടു.
കാമുകിയുടെ ശ്രദ്ധിക്കപെടാത്ത 
ഒരു മറുകെന്നു 
ചക്രവർത്തി.
ശെരിയാണ് 
എത്ര പടനയിച്ചതാവും 
ഓരോ പ്രണയവും. 

Friday, August 14, 2020

മുറിക്കവിതകൾ kindle ഇ ബുക്ക് ആയി പുറത്തിറിങ്ങിയിരിക്കുന്നു

 പ്രിയരേ  , ആദ്യ കവിതാ സമാഹാരം kindle ഇ ബുക്ക് ആയി പുറത്തിറിങ്ങിയിരിക്കുന്നു .മുൻപ് ബ്ലോഗിലും മാഗസിനുകളിലും എഴുതിയതും അല്ലാത്തത്തുമായ നാല്പതോളം മുറിക്കവിതകളുടെ സമാഹാരമാണ്. മുറിക്കവിതകൾ എന്ന് തന്നെയാണ് പുസ്തകത്തിന്റെ പേര്. ഒൻപതു വര്‍ഷങ്ങള്‍ക്കു മുൻപാണ് ബ്ലോഗിൽ ആദ്യമായി മുറിക്കവിതകൾ എന്ന പേരിൽ ഒരു കവിത എഴുതുന്നത് . പിന്നീടതിനു തുടർച്ചയുണ്ടായി. ഇന്നും നാളെയും  ഫ്രീ ആയി പുസ്തകം kindle ആപ്പ്  വഴി ഡൌൺലോഡ് ചെയ്യാം. മൊബൈലിൽ kindle app ഇൻസ്റ്റാൾ ചെയ്ത ശേഷം താഴെ ഉള്ള ലിങ്ക് വഴിയോ പുസ്തകത്തിന്റെ പേര് സെർച്ച് ചെയ്തോ ഫ്രീ ആയി മുറിക്കവിതകൾ ഡൌൺലോഡ് ചെയ്യാവുന്ന താണ് .  ഇത് വരെ വായിച്ചതും പ്രോത്സാഹിപ്പിച്ചതും നിങ്ങളാണ് . എല്ലാവര്‍ക്കും നന്ദി സ്നേഹം .

Link  - https://www.amazon.in/dp/B08FNSBZQV

Sunday, July 5, 2020

കളഞ്ഞു പോയ കൊലുസ്സ്.

നെഞ്ചിലെ  കിളിവാതിൽ അല്പം  തുറന്നൊരു
വാക്കിന്റെ കാഴ്ച തേടുമ്പോൾ. 
ദൂരെയൊരു മരമൊന്നിൽ പാർക്കുന്ന പക്ഷി 
ഒരു പാട്ടിന്റെ കൂടു തിരയുമ്പോൾ. 
ഏതോ പരിചിതമായൊരു മണമെന്റെ  
കരളിനെ തൊട്ടിട്ടു 
പണ്ടേ മറന്നൊരു പാട്ടായി 
പരിണമിക്കുമ്പോൾ. 

പാട്ടിലെ പെൺകുട്ടി 
പോകുന്ന വഴികളും കൊലുസിന്റെ താളത്തിൽ 
തലയാട്ടി നിൽക്കുന്ന 
നാട്ടു വരമ്പിലെ മുക്കുറ്റിപ്പൂക്കളും. 
അവളോളം പൊക്കത്തിൽ 
ചെമ്പരത്തിക്കാടും 
കാട്ടിലൊളിച്ചൊരു നാന്ദിയാർവട്ടവും.
മുല്ലയും തെച്ചിയും മലാഞ്ചി മൊഞ്ചുമായ് 
കൂടെ നടക്കുന്ന വഴിയിലെ വേലിയും.
ഒറ്റക്കൊലുസിന്റെ താളത്തിലോർമ്മയിൽ 
എന്നോ കളഞ്ഞൊരു 
കൊലുസിന്റെ ശബ്ദവും . 

കൗതുകത്തോടവൾ നുള്ളിയെടുക്കുന്ന  
ബോക്സിലൊളിപ്പിച്ചു മാറോടു ചേർക്കുന്ന 
സ്‌ളേറ്റ്  മയക്കുന്ന 
മാമര കൂട്ടവും. 
അവളുടെ വിരലിലൊരു 
പഞ്ഞിപോലെഴുകുന്ന 
കുഞ്ഞനിയന്റെയാ കൺമഷി ചന്തവും. 
അവളുടെ ചൂണ്ടു വിരലുകൊണ്ടനിയന്റെ 
കവിളിൽ വരച്ചൊരു  നുള്ളും തലോടലും 
പാട്ടിൽ തെളിഞ്ഞു തെളിഞ്ഞു മാഞ്ഞീടവെ . 
ദൂരെയൊരു മരമൊന്നിൽ  പാർക്കുമാ  പക്ഷി 
തൻ പാട്ടിന്റെ കൂടു കാണുന്നു. 
ഹൃദയത്തിന് കിളിവാതിൽ മുഴുവൻ തുറന്നു ഞാൻ 
വാക്കിന്റെ ജാഥ കാണുന്നു. 
എന്നോ കളഞ്ഞുപോയവളുടെ കൊലുസു 
ഞാൻ കവിതയിൽ കണ്ടെടുക്കുന്നു. 
...........................................................................